Frönsk eplakaka

Það jafnast fátt á við nýbakaða eplaköku með þeyttum rjóma eða vanilluís. Venjulega er bökudeig, eða mördeig eins það er einnig kallað, notað í hina dæmigerðu frönsku eplaköku en hér nota ég heimagert smjördeig. Það geymist vel í frysti og ef maður á það til útflatt þá er auðvelt mál að skella í eina köku með stuttum fyrirvara.

Í eina köku

Innihald

50 grömm smjör
½ vanillubaun
2 matskeiðar hrásykur
6 epli
1 matskeið smjör
1 smjördeigsbotn, um 25 sentímetrar í þvermál
100 grömm apríkósumarmelaði (fyrir apríkósugljáa)
1 matskeið vatn

Leiðbeiningar

  1. Forhitið ofn í 220°C. Bræðið smjörið í lítilli pönnu við miðlungshita. Hringsnúið pönnunni af og til og strjúkið botninn með sleikju. Hitið smjörið þar til mjólkurþurrefnin í smjörinu eru orðin brún og smjörið ilmar eins og heslihnetur, það tekur um 3 mínútur. Hellið smjörinu í litla hitaþolna skál og verið viss um að ná öllum mjólkurþurrefnunum úr pönnunni með sleikju. Helmingið hálfu vanillubaunina langsum, skafið fræin úr henni og setjið út í smjörið ásamt bauninni. Látið smjörið standa í um 10 mínútur til að það kólni og dragi í sig bragð vanillunnar.
  2. Flysjið,  kjarnhreinsið  og skerið 2 epli í grófa bita. Setjið þau í litla pönnu ásamt matskeið af smjöri og eldið í 10 mínútur undir loki yfir miðlungshita. Hrærið í þeim af og til. Takið lokið af, merjið eplin með gaffli og eldið þau þar til maukið er orðið tiltölulega þurrt, um 5 mínútur. Setjið maukið í skál til að kólna.
  3. Setjið smjörpappírsörk á ofnplötu, penslið vanillusmjörinu í um 25 sentímetra hring og stráið 1 matskeið af hrásykri yfir. Leggið smjördeigsbotninn ofan á og penslið með meira smjöri. Smyrjið eplamaukinu yfir allan botninn en skiljið eftir 1-2 sentímetra auðan jaðar til að maukið þyngi hann ekki og hann lyftist betur.
  4. Skerið restina af eplunum í helminga, kjarnhreinsið og skerið í 3 millimetra þykkar sneiðar. Raðið eplasneiðunum ofan á maukið þannig að þau skarist. Byrjið á stærstu sneiðunum og raðið yst í hringinn og vinnið ykkur inn að miðju með sífellt minni sneiðum.
  5. Penslið kökuna með vanillusmjörinu og stráið 1 matskeið af hrásykri yfir hana alla. Bakið hana í 10 mínútur við 220°C, lækkið hitann niður í 180°C og bakið 20 mínútur lengur.
  6. Undirbúið apríkósugljáann á meðan kakan er í ofninum. Setjið apríkósumarmelaði og vatn í pott og hitið yfir miðlungshita. Síið marmelaðið þegar það er orðið mjög fljótandi og haldið heitu. Hitið það upp aftur ef það stífnar áður en kakan er tilbúin.
  7. Færið kökuna yfir á kæligrind um leið og hún er tilbúin að penslið varlega með apríkósugljáanum. Eplakakan er best nýbökuð með þeyttum rjóma eða vanilluís.